حیدر جونیجو
پروفیسر ڈاکٹر عبدالمنان جونیجو نہ صرف سندھ بلکہ پورے پاکستان کے شعبہ صحت میں گردے کی بیماریوں کے علاج اور نیفروولوجی کے شعبے میں نمایاں خدمات کے لیے جانے جاتے ہیں۔ جناح پوسٹ گریجویٹ میڈیکل سینٹر، کراچی میں پروفیسر اور نیفروولوجی کے سربراہ کے طور پر وہ ملک کے نوجوان ڈاکٹروں کی تربیت اور مریضوں کی دیکھ بھال میں ایک مثال قائم کر چکے ہیں۔ 20 سال سے زائد تجربے کے حامل ڈاکٹر جونیجو نے نہ صرف جدید طبی سہولتیں متعارف کروائیں بلکہ سندھ اور بلوچستان میں نیفروولوجی کے شعبے کو فروغ دینے میں بھی کلیدی کردار ادا کیا۔
پروفیسر ڈاکٹر عبدالمنان جونیجو نے ایم بی بی ایس چانڈکا میڈیکل کالج، لاڑکانو سے حاصل کیا اور ڈاؤ میڈیکل کالج سول اسپتال، کراچی میں ہاؤس جاب کے دوران میڈیسن اور سرجری کے شعبے میں قیمتی تجربہ حاصل کیا۔ اپریل 1993 میں فیڈرل پبلک سروس کمیشن کے ذریعے تعینات ہونے کے بعد انہوں نے ابتدائی طور پر نیشنل انسٹیٹیوٹ آف چلڈرن ہیلتھ، کراچی میں پروفیسر افروز رمضان کے ساتھ پیڈیاٹرک نیفروولوجی میں خدمات انجام دیں۔
نیفروولوجی میں گہری دلچسپی اور لگن کی وجہ سے ڈاکٹر جونیجو جناح اسپتال کراچی اپنی خدمات دینے کے لئے منتقل ہوئے اور وہاں فیلوشپ کی تربیت مکمل کرنے کے بعد پہلی کوشش میں ایف سی پی ایس نیفروولوجی حاصل کر کے سندھ اور بلوچستان سے نیفروولوجی کے پہلے فیلو ہونے کا اعزاز حاصل کیا۔ ان کی قیادت میں سینکڑوں مریضوں کی زندگیوں میں بہتری آئی اور نوجوان ڈاکٹرز کی تربیت سے ملک میں نیفروولوجی کے شعبے کی بنیاد مزید مضبوط ہوئی۔
ان کا بین الاقوامی تجربہ بھی شاندار ہے۔ سعودی عرب کے ینبوع جنرل اسپتال اور کثیر القومی کمپنی “DIAVERUM” میں کنسلٹنٹ نیفروولوجسٹ کے طور پر خدمات انجام دینے کے دوران انہوں نے بین الاقوامی معیار کی دیکھ بھال فراہم کی اور پاکستان کے میڈیکل ماہرین کے لیے مثال قائم کی۔
فی الحال ڈاکٹر جونیجو FCPS-II نیفروولوجی پوسٹ گریجویٹس کی تربیت میں سرگرم ہیں اور ان کی نگرانی میں 20 سے زائد فیلو تربیت مکمل کر چکے ہیں جبکہ مزید 10 تربیت کے عمل میں ہیں۔ وہ رہائشی طلباء اور دیگر قومی و بین الاقوامی سی ایم ای سرگرمیوں میں بھی بھرپور حصہ لیتے ہیں، عوام کو صحت مند زندگی گزارنے اور بیماریوں سے تحفظ سے متعلق آگاہی سیمینار اور ریلی کی قیادت بھی کرتے ہیں۔ پاکستان میں طبی تعلیم و تحقیق کے فروغ میں پروفیسر ڈاکٹر عبدالمنان جونیجو نمایاں کردار ادا کر رہے ہیں۔
گردے کی بیماریوں کی روک تھام، ایکیوٹ اور کرونک کڈنی ڈیزیز، ذیابیطس اور ہائی بلڈ پریشر کے خطرات، گلومرولر بیماریوں، نیفروٹک سنڈروم، ہیموڈائیلیسس، گردے کی ٹرانسپلانٹ سرجری اور مریضوں کی قبل و بعد کی فالو اپ بھی بہترین انداز میں کرتے ہیں۔
پروفیسر ڈاکٹر عبدالمنان جونیجو کی خدمات نہ صرف مریضوں کی زندگیوں میں امید کا چراغ ہیں بلکہ ملک کے طبی شعبے میں معیار اور تربیت کا معیار بلند کرنے کا ذریعہ بھی ہیں۔ ہم دعا گو ہیں کہ ان کی محنت اور لگن آئندہ بھی پاکستان کے شعبہ صحت میں روشنی کا مینار بنی رہے اور ان کا شمار ملک کے معزز طبی ماہرین میں ہمیشہ ہوتا رہے۔
