اسلام آباد (سماج نیوز) ورلڈ اینٹی مائیکروبیل ریزسٹنس آگاہی واک اسلام آباد میں منعقد ہوئی جس میں ورلڈ ہیلتھ آرگنائزیشن، نیشنل انسٹیٹیوٹ آف ہیلتھ، مختلف صحت کے اداروں، طلبہ اور شہریوں نے شرکت کی۔ واک کی قیادت ڈبلیو ایچ او کے کنٹری نمائندہ ڈاکٹر ڈابانگ، پولیو کے نیشنل ٹیکنیکل فوکل پرسن ڈاکٹر الطاف بوسن اور این آئی ایچ کے سربراہ ڈاکٹر سلمان نے کی۔
ماہرین کے مطابق اینٹی بائیوٹکس کے غلط اور ضرورت سے زیادہ استعمال نے ان کی تاثیر کم کر دی ہے، جس سے دنیا بھر میں لاکھوں جانیں خطرے میں پڑ رہی ہیں۔ اگر اینٹی بائیوٹکس کام کرنا چھوڑ دیں تو عام بیماریاں دوبارہ جان لیوا ثابت ہو سکتی ہیں، جبکہ سرجری، زچگی اور کینسر کے علاج جیسے اہم طبی طریقۂ کار بھی نہایت خطرناک ہو جاتے ہیں۔
اس آگاہی مہم کا مقصد اینٹی بائیوٹکس کے ذمہ دارانہ استعمال کی فوری ضرورت پر زور دینا ہے یعنی ادویات صرف مستند طبی ماہرین کے مشورے پر ہی استعمال کی جائیں، جبکہ انفیکشن سے بچاؤ، ویکسینیشن، نگرانی اور عوامی شعور کی مضبوطی کو بھی یقینی بنایا جائے۔
شرکاء نے کہا کہ یہ واک اس اجتماعی ذمہ داری کی علامت ہے کہ ہم مستقبل کی نسلوں کے لیے اینٹی بائیوٹکس کی افادیت کو محفوظ رکھیں۔ متحد ہو کر ہی ہم اپنی صحت اور اپنے مستقبل کو محفوظ بنا سکتے ہیں۔
اینٹی بائیوٹکس ایک مشترکہ اثاثہ ہیں، آئیے انہیں آج محفوظ کر کے آنے والے کل کو صحت مند بنائیں۔