کراچی (سماج رپورٹ): وزیر توانائی، ترقیات و منصوبہ بندی سندھ سید ناصر حسین شاہ نے روشنی کے ایک نئے دور کا اعلان کرتے ہوئے کہا کہ ورلڈ بینک کے تعاون سے شروع کیا گیا دو لاکھ سولر ہوم سسٹم کا منصوبہ 31 جولائی 2025 تک مکمل کرلیا جائے گا۔ یہ بات انہوں نے انرجی ڈپارٹمنٹ میں سولر ہوم سسٹم کی تقسیم کے منصوبے کی پیش رفت کا جائزہ لینے کے لیے منعقدہ اجلاس کی صدارت کے دوران کہی۔ اس موقع پر وزیر بلدیات سندھ سعید غنی نے بھی خصوصی شرکت کی، جبکہ اجلاس میں سیکریٹری انرجی ڈپارٹمنٹ مصدق احمد خان، اسٹیٹ اسٹیکس ایڈوائزر سونیا سومرو، پروجیکٹ کے سربراہ سید زین حیدر، سکندر علی اور عبدالغنی بھی شریک تھے۔
اجلاس میں اس اہم منصوبے کی بروقت تکمیل پر زور دیا گیا، جسے چیئرمین بلاول بھٹو زرداری کے وژن اور وزیراعلیٰ سندھ کی ہدایات کے تحت تیزی سے مکمل کرنے کا عزم کیا گیا۔ وزیر توانائی سید ناصر حسین شاہ نے ہدایت دی کہ ہر ماہ سندھ کے تمام اضلاع میں 1,600 سولر ہوم سسٹم کی تقسیم یقینی بنائی جائے، جبکہ ہر ضلع میں ہر ہفتے کم از کم 400 سولر یونٹس تقسیم کیے جائیں۔
انہوں نے مزید تاکید کی کہ 31 جولائی 2025 تک ہر حال میں اس منصوبے کو مکمل کیا جائے، تاکہ دور دراز علاقوں میں بھی توانائی کی روشنی پہنچے اور گھروں میں اندھیرے ماضی کا قصہ بن جائیں۔ مزید برآں، ویئر ہاؤس میں موجود 50 ہزار سولر پینلز کی تقسیم 30 دنوں میں مکمل کرنے کی ہدایت کی گئی، اور اس حوالے سے تفصیلی رپورٹ پیش کرنے کا حکم دیا گیا۔
ناصر حسین شاہ نے واضح کیا کہ سولر پینلز کی شفاف تقسیم کو یقینی بنانے کے لیے ضلعی انتظامیہ کے تعاون سے خصوصی تقریبات منعقد کی جائیں گی، جہاں مقامی افراد خود اپنے گھروں کو روشن کرنے کے اس سفر کا حصہ بن سکیں گے۔
یہ منصوبہ سندھ کے عوام کے لیے صرف بجلی کا ذریعہ نہیں، بلکہ ایک بہتر اور روشن مستقبل کی امید ہے۔ جب ہر گھر میں توانائی کی کرن پہنچے گی، تبھی سندھ حقیقی معنوں میں ترقی اور خودکفالت کی جانب قدم بڑھا سکے گا۔